Azərbaycanın milli şirniyyat növlərindən biridir.

Ərzaqlar:( 28-32 s.m-lik 2 tavalıq paxlavanın ölçüləri)

Xəmir üçün:

1kq un, 3 yumurta, 250 q kərə yağı, 1 st süd, 2 x.q xama, 1 ç.q quru maya, duz

İçlik üçün:

(İçliyi badam ləpəsi ilə də edə bilərsiniz.Qoz ya da badam ləpəsinin qabığını çıxardıb qoz çəkən maşından keçiririk)

1 kq qoz ləpəsi, 1kq  şəkər tozu, 1/3 (üçdəbir) ç.q hil.

Yağlamaq üçün:

400 – 450 q kərə yağı

Şərbət üçün:

(hər tavaya 1st şəkər tozu,0,5 su)

2 st. şəkər tozu, 1 st. su

Üzü üçün:

2 ədəd yumurta sarısı, badam ləpəsi ( fındıq ya da qoz ləpəsi qoymaq olar)

Hazırlanması:

Xəmiri hazırlayaq. Südü qaba töküb ilıq qızdırırıq.

Yağı əridirik.

Mayanı ilıq suda qarışdırırıq 5-10 dəqiqə qalır köpüklənir.

Unun ortasına yumurtanı, mayanı, südü, yağı, xamanı və duzu əlavə edirik.

Yumşaq xəmir yoğururuq.

Xəmirin üstünə neylon çəkib, dəsmal qoyub, ədyala bükürük, 2 saat acımağa qoyuruq.

İçlik hazırlayırıq. Qozu tavada qovurub qabığını təmizlədikdən sonra qoz çəkən maşından keçiririk.

Çəkilmiş qozu şəkər tozu və hil ilə qarışdırırıq. Yuxaları yağlamaq üçün yağı əridirik.

Şərbəti hazırlayırıq. Qaba suyu və şəkər tozunu əlavə edib qaynara düşən kimi 2-3 dəqiqə qaynadıb, götürük.

Üzünə çəkmək üçün yumurta sarısını bir qaba sındırıb çalırıq.

Üzü üçün badam ləpəsini təmizləyirik. Bax: Badam ləpəsinin təmizlənməsi

Xəmir 2 saata acıyır.

Xəmiri hər tava üçün12 hissəyə bölürük. İki kündəni böyük (ən alt və ən üst üçün) qalanlarını isə balaca kündələyirik.

Yuxanı (az) unla yayırıq.

Tavanı yağlayıb yuxanı səririk. Yuxaya yağ töküb yağlayırıq.

Hər qata 1 stəkandan 1 barmaq aşağı içlik səpirik.

Yenə yuxanı sərib yağlayırıq.

Bu şəkildə bütün qatları hazırlayırıq. Axırıncı qatı qoyduqdan sonra kənarlarını yaxşı düzəldirik.

Xəmiri romb şəklində kəsirik.

Yarım saat saxlayırıq. Sonra yumurtalayıb ortalarına badam ləpələrini qoyuruq.

180 dərəcə qızdırılmış sobada üzü az qızarana qədər bişiririk. Sonra layları yağıadığımız yağdan qalanını paxlavanı sobadan çıxarıb aralarına tökürük. Dərəcəni 150 dərəcəyə qoyuruq. Üzü tam qızarana yaxın çıxarıb şərbətini tökürük. Hər iki halda bıçaqla kəsilən yerlərlə bir də gedirik ki, həm yağ həm də şərbət hər yana yaxşı yayılsın.

Şərbəti tökdükdən sonra sobada 3-5 dəqiqə saxlayıb götürürük.

Paxlava ilıq olanda tavadan tək-tək çıxarıb başqa düz qaba aralı yığırıq.

Qeyd: Paxlavanın üzünün parıltılı və gözəl olmağını istəyirsinizsə onda paxlavanın şərbətindən 3 x.q götürüb 1 x.q bal ilə əridib firça ilə hazır olan isti paxlavanın üzünə çəkirik.

Nuş olsun!

Comments

comments