Bu qutab Azərbaycanın qədim milli şirniyyatlarının bir növüdür.
Ərzaqlar:
Xəmir üçün:
6 st un
1-2 ədəd yumurta
1/3 ç.q sarıkök
1 x.q duz
1ç.q maya
2 st ilıq su (təqribən)
Yuxaları yaymaq üçün un
İç üçün:
1 st uzun düyü
1/3 st kişmiş (zövqə görə)
2 x.q şəkər tozu(zövqə görə)
Düyünü bişirərkən suyuna tökmək üçün:
1 ç.q duz
Qızartmaq üçün:
Bitki yağı ya da əridilmiş kərə yağı
Qeyd: Yuxarıda göstərilən xəmir reseptinə görə 14 ədəd yuxa alınır. Bu içliyə görə isə 7 ədəd yuxanı kəsib bükmək olur. İstəsəniz xəmirin reseptini yarı azalda ya da içliyi iki dəfəyə artıra bilərsiniz.
Hazırlanması:
İçliyi hazırlamaq üçün kişmişi təmizləyib yuyuruq.
Düyünü təmizləyib yuyuruq.
Qaynayan suya duz töküb yuyulmuş düyünü töküb bişiririk. Düyünü adi plovlarda olan kimi bişiririk.
Düyünü süzürük. Üstünə soyuq qaynamış su tökürük. Onda düyü yapışmır.
Kişmişi düyünü və şəkər tozunu qarışdırırıq. İçliyimiz hazırdı.
Xəmiri hazırlamaq üçün bax: [url=http://resept.az/Qutab-xemirinin-hazirlanmasi-3419.html]Qutab xəmirinin hazırlanması[/url]
Hazır yuxanı 8sm enində kəsirik.
Qutabı aşağıdakı şəkildəki kimi bükürük. (Şəkili yerdə çəkdiyimə baxmayaraq qutab əldə bülülür) Kəsdiyimiz lentin birini əlimizə alırıq.
Baş hissəbən fırladıb içəri döğru qatlayırıq.
İçinə 1 x.q dolu içlik qoyuruq.
Bir dəfə qatlayırıq.
Ağız hissədəki yuxanı üç künc kəsirik.
Kəsilmiş yuxanın uc hissəsini içəri doğru qatlayıb soxuruq.
Qutab hazırdır.
Bükülmüş qutablari qurumasın deyə qaba yığıb ağzını örtürük ya da sellofana yığıb soyuducuda saxlayırıq. Süfrəyə veriləndə tavada yağı qızdırıb hər iki üzünü qızardırıq.
Qeyd: Zövqə görə qutabların üstünə şəkər kirşanı ya da şəkər tozu səpə bilərsiniz.
Yuxaların yanlarından qalan hissələrdən xingal bişirə bilərsiniz.
Nuş olsun!
